४ तास ४३ मिनिटं अशा विक्रमी वेळात पोहून अंतर केले पार
मुंबई | ५ मे :
अवघ्या १४ वर्षांच्या वयात मल्हार कुंदन देसाई या विद्यार्थ्याने खुल्या समुद्रात पोहण्याचा थरारक विक्रम नोंदवत क्रीडा क्षेत्रात आपली वेगळी छाप उमटवली आहे. प्रोंग्स रीफ लाइटहाऊस ते ट्रॉम्बे जेट्टी असा सुमारे २५ किलोमीटरचा प्रवास त्यांनी अवघ्या ४ तास ४३ मिनिटांत पूर्ण करत हा ऐतिहासिक पराक्रम साध्य केला.
हिरानंदानी फाउंडेशन स्कूलमध्ये इयत्ता नववीत शिक्षण घेणाऱ्या मल्हारने हा पराक्रम करत या मार्गावर एकट्याने पोहून यशस्वीरीत्या पूर्ण करणारा पहिला जलतरणपटू होण्याचा मान मिळवला आहे. (14-Year-Old Malhaar Desai Sets Record; Completes 25 km Open Sea Swim from Prongs Reef Lighthouse to Trombay Jetty)
मल्हार गेल्या काही वर्षांपासून रामचंद्र ठाकूर जलतरण तलावातील रुपाली रेपाळे स्विमिंग अकॅडमीतर्फे कठोर सराव करत आहे. दररोज ३ ते ४ तासांचा सराव, सातत्य आणि जिद्दीच्या जोरावर त्याने खुल्या पाण्यातील स्पर्धांकडे आपला कल वाढवला. वयाच्या केवळ ११ व्या वर्षी त्याने जलतरणाची सुरुवात केली होती. राष्ट्रीय स्तरावरही मल्हारने आपली क्षमता सिद्ध केली असून, कोची येथे झालेल्या ओपन नॅशनल स्विमाथॉन स्पर्धेत १० किमी शर्यतीत तिसरा क्रमांक पटकावला आहे. समुद्रातील हा २५ किमीचा प्रवास हा त्याचा पहिलाच सोलो लांब पल्ल्याचा प्रयत्न होता.
या विक्रमादरम्यान त्याला जोरदार वारे, भरतीची लाट आणि खडबडीत पाण्याच्या परिस्थितीचा सामना करावा लागला. मात्र या सर्व अडचणींवर मात करत मल्हारने आपली चिकाटी आणि मानसिक क्षमता सिद्ध केली. हा संपूर्ण उपक्रम महाराष्ट्र राज्य अमेच्युअर जलतरण संघटनेच्या देखरेखीखाली पार पडला असून सर्व अधिकृत नियमांचे पालन करण्यात आले.
आपल्या या यशानंतर मल्हारने आपल्या आई-वडिलांचे पाठबळ, प्रशिक्षक रुपाली रेपाळे आणि अनिरुद्ध महाडिक यांचे मार्गदर्शन, तसेच संघटनेचे सचिव राजेंद्र पालकर यांच्या प्रोत्साहनाबद्दल कृतज्ञता व्यक्त केली.
मल्हार देसाईचा हा पराक्रम केवळ विक्रम नाही, तर भारतीय खुल्या जलतरण क्षेत्रात उदयास येणाऱ्या एका उज्ज्वल प्रतिभेची नांदी ठरत असल्याची प्रतिक्रिया व्यक्त होत आहे.