कल्याण तालुक्यातील जिल्हा परिषदेच्या वाघेरेपाडा शाळेत संविधान दिन उत्साहात साजरा

कल्याण दि.29 नोव्हेंबर :
वाघेरेपाडा जिल्हा परिषद शाळेत संविधान दिन मोठ्या उत्साहात आणि सर्व विद्यार्थ्यांच्या उपस्थितीत साजरा करण्यात आला. कार्यक्रमाची सुरुवात मुख्याध्यापिका आशा शिंगाडे यांनी केली. त्यांनी संविधान दिनाचे महत्व अधोरेखित करत विद्यार्थ्यांना लोकशाही मूल्ये जपण्याचे आवाहन केले. (Constitution Day celebrated with great enthusiasm at the Wagherepada School under the Kalyan Taluka Zilla Parishad)

यानंतर विद्यार्थ्यांनी सामूहिकरित्या संविधानाची प्रास्ताविक वाचून लोकशाहीचा आवाज बुलंद केला. संविधान जनजागृती व्हावी यासाठी शाळेच्या वतीने पालखीत संविधानाची प्रास्ताविक चा फोटो ठेवून वाडीत फेरी काढण्यात आली. या फेरीदरम्यान विद्यार्थ्यांनी जयघोष करून लोकशाहीचा संदेश दिला. पालखी फेरीमुळे गावात संविधानाचे महत्व पोहोचवण्याचा प्रयत्न झाला.

कार्यक्रमात सामाजिक कार्यकर्ते विशाल जाधव यांनी विद्यार्थ्यांना व पालकांना संविधानाचे महत्व आणि मूलभूत अधिकार यावर मार्गदर्शन केले. त्यांनी समानता, स्वातंत्र्य, शोषणाविरुद्ध संरक्षण, धर्मस्वातंत्र्य, सांस्कृतिक आणि शैक्षणिक अधिकार आणि संवैधानिक उपाय यांची माहिती सोप्या भाषेत दिली.

कार्यक्रमाच्या समारोपाला शिक्षिका अरुणा भोये यांनी आभार मानले. त्यांनी सर्व उपस्थितांचे सहकार्याबद्दल कृतज्ञता व्यक्त केली. शेवटी अंजना कडव यांनी गीत सादर करून कार्यक्रमाला सांस्कृतिक रंग दिला आणि सांगता केली.
शाळेच्या या उपक्रमाचे पालक व ग्रामस्थांनी कौतुक केले.