नव्या वास्तूत प्रथमच बाप्पांचे आगमन; रहिवाशांचा उत्स्फूर्त सहभाग, भक्ती आणि एकोप्याचे वातावरण
कल्याण | २५ सप्टेंबर
नव्या घरात प्रवेश केल्यानंतर अवघ्या काही महिन्यांतच ‘एक सोसायटी – एक परिवार’ या भावनेची प्रचिती देत कल्याण पश्चिमेतील रामबाग लेन नं. ४ येथील मंगेशी वुड्स सोसायटीमध्ये प्रथमच गणपती बाप्पांचा उत्सव मोठ्या उत्साहात आणि भक्तिमय वातावरणात साजरा करण्यात आला. सोसायटीतील सर्व इमारतींमधील रहिवासी एकत्र आल्याने संपूर्ण परिसरात उत्साह, आनंद आणि भक्तीचे वातावरण निर्माण झाले. (Ganeshotsav Celebrated with Grandeur at Kalyan’s Mangeshi Woods Society; ‘One Society, One Family’ Spirit Takes Centre Stage)
नव्या सोसायटीतील पहिलाच गणेशोत्सव…
मंगेशी वुड्स ही नुकतीच स्थापन झालेली सोसायटी असून येथील रहिवासी अवघ्या दोन ते चार महिन्यांपूर्वी आपल्या नव्या घरात वास्तव्यास आले आहेत. नव्या वास्तूत पहिल्यांदाच गणरायाचे आगमन होत असल्याने यंदाचा गणेशोत्सव रहिवाशांसाठी विशेष ठरला. सोसायटीतील रहिवाशांनी एकत्र येत गणेशोत्सवाचे नियोजन केले. उत्सवाच्या तयारीपासून ते विविध व्यवस्थांपर्यंत प्रत्येकाने आपली जबाबदारी स्वीकारल्याने सामूहिक सहभागातून गणेशोत्सव साजरा करण्याची नवी परंपरा सुरू झाली.
महिला, युवक आणि ज्येष्ठ नागरिकांचा उत्स्फूर्त सहभाग…
गणेशोत्सवाच्या आयोजनामध्ये सोसायटीतील सर्व इमारतींमधील रहिवासी, पदाधिकारी आणि कार्यकर्त्यांसह महिला, युवक तसेच ज्येष्ठ नागरिकांनी उत्स्फूर्त सहभाग घेतला. प्रत्येकाने आपापल्या परीने योगदान दिल्याने सोसायटीतील परस्पर संवाद आणि आपलेपणाची भावना अधिक दृढ झाली. उत्सवाच्या निमित्ताने संपूर्ण सोसायटीमध्ये भक्ती, आनंद, उत्साह आणि सामाजिक एकात्मतेचे वातावरण अनुभवायला मिळाले.
मान्यवरांनी घेतले बाप्पांचे दर्शन…
गणेशोत्सवानिमित्त विविध मान्यवरांनी मंगेशी वुड्स सोसायटीला भेट देऊन श्री गणरायाचे दर्शन घेतले. यावेळी त्यांनी सोसायटीतील रहिवाशांना गणेशोत्सवाच्या शुभेच्छा दिल्या. मान्यवरांच्या उपस्थितीमुळे उत्सवाची शोभा आणखी वाढली.
‘एक सोसायटी – एक परिवारा’ची भावना दृढ…
पहिल्याच वर्षी सर्व रहिवाशांनी एकत्र येऊन गणेशोत्सव साजरा केल्याने ‘एक सोसायटी – एक परिवार’ ही संकल्पना प्रत्यक्षात उतरल्याचे चित्र पाहायला मिळाले. नव्या सोसायटीतील रहिवाशांमध्ये निर्माण झालेला हा आपलेपणा भविष्यातील विविध सामाजिक आणि सांस्कृतिक उपक्रमांसाठीही सकारात्मक पायाभरणी ठरणार आहे. गणेशोत्सवाच्या यशस्वी आयोजनाबद्दल सोसायटीच्या वतीने सर्व रहिवासी, पदाधिकारी, कार्यकर्ते, महिला, युवक आणि ज्येष्ठ नागरिकांचे आभार मानण्यात आले.
बाप्पांच्या चरणी सुख-समृद्धीची प्रार्थना…
यावेळी श्री गणरायाच्या चरणी देशातील प्रत्येक नागरिक सुखी, समाधानी आणि निरोगी राहावा, सर्वांच्या जीवनात आनंद, शांती आणि समृद्धी नांदावी, कोणालाही दुःख किंवा त्रास सहन करावा लागू नये आणि गणपती बाप्पांच्या आशीर्वादाने सर्वांचे कल्याण व्हावे, अशी प्रार्थना करण्यात आली.
