कल्याण, डोंबिवली, बदलापूर, तळोजासह अनेक शहरांत उष्णतेची तीव्र लाट
कल्याण डोंबिवली दि.12 एप्रिल :
राज्यात एप्रिल महिन्याच्या मध्यातच उन्हाचा तीव्र तडाखा जाणवू लागला असून अंतर्गत कोकण भागात तापमानात मोठी वाढ झाली आहे. परिणामी कल्याण डोंबिवलीमध्ये आज तब्बल 41 डिग्री सेल्सिअसहून अधिक तापमानाची नोंद झाल्याची माहिती हवामान अभ्यासक अभिजीत मोडक यांनी एलएनएनशी बोलताना दिली आहे. तसेच आजच्या दिवशी कल्याण डोंबिवलीसह अनेक ठिकाणी तापमानाने ४० अंश सेल्सिअसचा टप्पा ओलांडल्याने उष्णतेच्या लाटेसदृश परिस्थिती निर्माण झाल्याचे पाहायला मिळाले. (Heatwave-Like Conditions; Temperatures Cross 41°C in Kalyan-Dombivli)
विशेषतः घाटमाथ्याच्या पायथ्याशी असलेल्या भागांमध्ये तापमानाने उच्चांक गाठला असून बिरवाडी येथे राज्यातील सर्वाधिक ४३.९ अंश सेल्सिअस तापमानाची नोंद झाली. त्यापाठोपाठ भातसा नगर (४३.२), चिपळूण (४३), सुकसाळे (४२.८), कर्जत (४२.२) आणि नेरळ (४२.१) येथेही तीव्र उष्णतेची नोंद झाली.
कल्याण-डोंबिवली परिसरातही आज उन्हाचा चटका चांगलाच वाढला असून कल्याणमध्ये ४१.४ अंश सेल्सिअस तर डोंबिवलीत ४१.२ आणि बदलापूरमध्ये ४१ अंश सेल्सिअस इतके उच्चांकी तापमान नोंदवले गेले.
दरम्यान किनारपट्टीलगतच्या ० ते ५ किमी परिसरात मात्र तापमान तुलनेने नियंत्रित राहिले असून समुद्री वाऱ्यामुळे उष्णतेची तीव्रता कमी जाणवत आहे. मुंबई सांताक्रुझ, रत्नागिरी येथे ३४.५ अंश तर वेंगुर्ला येथे ३३ अंश तापमानाची नोंद झाली.
हवामान अभ्यासक अभिजीत मोडक यांच्या मते पुढील काही दिवसांतही अंतर्गत भागात उष्णतेची ही तीव्रता अशीच कायम राहण्याची शक्यता असून नागरिकांनी दुपारच्या वेळेत बाहेर पडताना विशेष काळजी घेण्याचे आवाहन करण्यात आले आहे.
१२ एप्रिल २०२६ रोजी नोंद झालेले कमाल तापमान (°C)
कल्याण 41.4°C
डोंबिवली 41.2°C
| बिरवाडी | 43.9°C |
| भाटसानगर | 43.2°C |
| चिपळूण | 43°C |
| सुकसाळे | 42.8°C |
| कर्जत | 42.2°C |
| नेरळ | 42.1°C |
| पलावा | 42°C |
| तळोजा | 41.7°C |
| वैभववाडी / मनोर | 41.3°C |
| बदलापूर | 41°C |
| मुंब्रा / दिवा | 41°C |
| कळवा | 40.9°C |
| मोरबे | 40.8°C |
| खारघर / दिघा | 40°C |
| ठाणे | 39.9°C |
| मुलुंड | 39.4°C |
| ऐरोली | 39.3°C |
| पनवेल | 39.2°C |
| कोपरखैरणे | 38.8°C |
| नवी मुंबई विमानतळ | 38°C |
| कांजूरमार्ग | 37.7°C |
| नेरुळ | 37.1°C |
| पालघर | 37°C |
| विरार | 36.2°C |
| डहाणू | 36°C |
| दापोली | 35.7°C |
| देवनार | 35°C |
| मुंबई SCZ / रत्नागिरी | 34.5°C |
| उत्तन | 34.4°C |
| वेंगुर्ला | 33°C |
| देवगड | 32.7°C |
| हर्णे | 32.5°C |