कल्याणात पाणीपुरवठ्याची समस्या गंभीर; उल्हास नदीपात्रातील मुख्य जलवाहिनी फुटली; दुरुस्तीसाठी ४८ तास लागण्याची शक्यता

कल्याण | ७ जुलै :
सतत सुरू असलेल्या मुसळधार पावसामुळे उल्हास नदीच्या वाढत्या पाणीपातळीचा फटका कल्याण-डोंबिवली महानगरपालिकेच्या पाणीपुरवठा व्यवस्थेला सलग दुसऱ्या दिवशी बसला आहे. काल नदीचे पाणी मोहिली जलशुद्धीकरण केंद्रात शिरल्यामुळे पाणीपुरवठा बंद असतानाच आता उल्हास नदीपात्रातील मुख्य जलवाहिनी तुटल्याने बारावे जलशुद्धीकरण केंद्रातून होणारा पाणीपुरवठाही पूर्णपणे बंद झाला आहे. या जलवाहिनीच्या दुरुस्तीसाठी तब्बल ४८ तास लागण्याची शक्यता असल्याने कल्याणकरांचा पाणीप्रश्न अधिकच गंभीर झाला आहे. (Major Water Crisis Hits Kalyan: Main Pipeline in Ulhas Riverbed Ruptures, 48-Hour Repair Operation Underway)

महापालिकेने दिलेल्या माहितीनुसार, मुसळधार पावसामुळे उल्हास नदीच्या प्रवाहात झपाट्याने वाढ झाली असून, नदीपात्रातून जाणाऱ्या मुख्य जलवाहिनीला तडा गेल्याने बारावे जलशुद्धीकरण केंद्रातून होणारा पाणीपुरवठा खंडित झाला आहे. या बिघाडाचा थेट परिणाम कल्याण पश्चिम आणि कल्याण पूर्व परिसरातील हजारो नागरिकांवर झाला असून, या दोन्ही भागांचा पाणीपुरवठा पूर्णपणे ठप्प झाला आहे.

महापालिकेने या मुख्य जलवाहिनीच्या दुरुस्तीचे काम युद्धपातळीवर सुरू केले असून, दुरुस्तीचे काम पूर्ण होण्यासाठी किमान ४८ तासांचा कालावधी लागण्याची शक्यता वर्तविण्यात आली आहे. त्यानंतरच पाणीपुरवठा पूर्ववत होऊ शकणार असल्याचे प्रशासनाने स्पष्ट केले आहे.

विशेष म्हणजे, काल मोहिली जलशुद्धीकरण केंद्रात उल्हास नदीचे पाणी शिरल्याने त्या केंद्रातून होणारा पाणीपुरवठा बंद झाला होता. त्यातच आता बारावे जलशुद्धीकरण केंद्राची मुख्य जलवाहिनी तुटल्याने केडीएमसीच्या पाणीपुरवठा व्यवस्थेवर दुहेरी संकट ओढवले आहे.

दरम्यान, महापालिका प्रशासनाने नागरिकांना पाण्याचा अत्यंत काटकसरीने वापर करण्याचे आवाहन केले असून, आवश्यक तेवढाच पाण्याचा वापर करावा आणि दुरुस्तीचे काम पूर्ण होईपर्यंत सहकार्य करण्याची विनंती केली आहे. प्रशासनाकडून जलवाहिनी दुरुस्तीचे काम वेगाने सुरू असून, परिस्थिती सामान्य होताच पाणीपुरवठा टप्प्याटप्प्याने पूर्ववत करण्यात येणार असल्याचेही महापालिकेने म्हटले आहे.