उमंग प्रतिष्ठान आणि पियुष डान्स स्टुडिओतर्फे भव्य गरबा महोत्सवाचे आयोजन; मुख्यमंत्री सहायता निधीसाठी आर्थिक मदत देणार
कल्याण | ९ ऑक्टोबर
नवरात्रोत्सवाच्या निमित्ताने कल्याणमध्ये गरबाप्रेमींसाठी एका भव्य सांस्कृतिक सोहळ्याचे आयोजन करण्यात आले आहे. ‘रास गरबा २०२६’ हा गरबा महोत्सव ११ ते १९ ऑक्टोबर २०२६ या कालावधीत कल्याण पश्चिमेतील गौरीपाडा परिसरात रंगणार आहे. मेहुल गंग्गर (MG Music) यांच्या संगीताच्या तालावर गरबाप्रेमींना नृत्याचा आनंद लुटता येणार आहे. विशेष म्हणजे, महाराष्ट्रातील सध्याच्या दुष्काळी परिस्थितीचे गांभीर्य लक्षात घेऊन या उत्सवाच्या माध्यमातून दुष्काळग्रस्तांना मदत करण्याचा सामाजिक उपक्रमही हाती घेण्यात आला आहे. या उपक्रमांतर्गत मुख्यमंत्री सहायता निधीसाठी आर्थिक मदत दिली जाणार असल्याची माहिती आयोजकांनी दिली. (Raas Garba 2026 in Kalyan from October 11–19; Live Music by Mehul Ganggar and a Helping Hand for Drought-Affected Farmers)
दुष्काळग्रस्तांच्या मदतीसाठी गरबा उत्सवातून सामाजिक बांधिलकी!
महाराष्ट्रातील सध्याची दुष्काळी परिस्थिती लक्षात घेता, केवळ मनोरंजनापुरता मर्यादित न राहता सामाजिक बांधिलकी जपण्याचा प्रयत्न ‘रास गरबा २०२६’च्या माध्यमातून करण्यात येणार आहे. या महोत्सवातून मुख्यमंत्री सहायता निधीसाठी आर्थिक मदत दिली जाणार आहे.
तसेच, गरबा उत्सवाच्या ठिकाणी देणगीसाठी एक विशेष हुंडी ठेवण्यात येणार आहे. या हुंडीमध्ये नागरिक आणि गरबाप्रेमींकडून जमा होणारा संपूर्ण निधी मुख्यमंत्री सहायता निधीसाठी देण्यात येणार आहे. त्यामुळे नवरात्रोत्सवाचा आनंद लुटतानाच महाराष्ट्रातील दुष्काळग्रस्तांना मदतीचा हात देण्याची संधी नागरिकांना मिळणार आहे.
‘गरब्याच्या तालावर जल्लोष, तर दुष्काळग्रस्तांच्या मदतीसाठी सामाजिक बांधिलकी’ अशी या उपक्रमाची संकल्पना असून, सांस्कृतिक उत्सवातून समाजोपयोगी कार्य करण्याचा आयोजकांचा प्रयत्न आहे.
कुठे आणि कधी होणार महोत्सव?
‘रास गरबा २०२६’चे आयोजन ११ ते १९ ऑक्टोबर २०२६ या कालावधीत सायंकाळी बरोबर ७.३० वाजता सुरू होणार आहे. . हा महोत्सव कल्याण पश्चिमेतील योगीधाम, गौरीपाडा येथील ग्रीन सिटी लॉनमध्ये, सिटी पार्कच्या शेजारी उभारण्यात आलेल्या वातानुकूलित डोममध्ये होणार आहे. एसी डोममध्ये आयोजित करण्यात येणाऱ्या या महोत्सवात गरबाप्रेमींना नऊ दिवस उत्सवी वातावरणाचा आनंद घेता येणार आहे.
मेहुल गंग्गर यांच्या संगीताची रंगत!
या महोत्सवाचे विशेष आकर्षण म्हणजे मेहुल गंग्गर (MG Music) यांची संगीत प्रस्तुती. त्यांच्या संगीताच्या तालावर गरबाप्रेमींना पारंपरिक गरबा आणि नृत्याचा आनंद अनुभवता येणार आहे. पारंपरिक गुजराती गरब्याची संस्कृती आणि आधुनिक संगीत सादरीकरण यांचा संगम या महोत्सवात पाहायला मिळणार आहे.
उमंग प्रतिष्ठान, पियुष डान्स स्टुडिओ आणि फिनिक्स ग्रुपचा पुढाकार
‘रास गरबा २०२६’चे आयोजन उमंग प्रतिष्ठान आणि पियुष डान्स स्टुडिओ यांच्या सहभागातून, तर फिनिक्स ग्रुपच्या सादरीकरणातून करण्यात येत आहे. या महोत्सवाला सीझन्स ऑरा यांचे सहकार्य असून रेजेन्सी ग्रुप सहयोगी प्रायोजक आहे.
उमंग प्रतिष्ठानचे अध्यक्ष राकेश मुथा, मुख्य सल्लागार दिनेश सोमाणी, पियुष डान्स अकादमीचे पियुष सेन आणि कार्यकारी अध्यक्ष भूषण शाह यांच्यासह आयोजक मंडळातील सदस्य या महोत्सवाच्या यशस्वितेसाठी कार्यरत आहेत.
सांस्कृतिक परंपरेचे जतन, संगीत आणि नृत्याचा आनंद यांसोबतच दुष्काळग्रस्तांच्या मदतीसाठी आर्थिक योगदान देण्याचा संदेश ‘रास गरबा २०२६’च्या माध्यमातून दिला जाणार आहे. त्यामुळे हा महोत्सव कल्याणकरांसाठी मनोरंजनासोबतच सामाजिक संवेदनशीलतेची जाणीव करून देणारा उपक्रम ठरणार आहे.