तर पोलीसांकडून एरव्हीही सहकार्याची अपेक्षा नागरिकांनी केली व्यक्त
कल्याण, दि.29 नोव्हेंबर :
नागरिक आणि पोलीस प्रशासन यांच्यातील संवाद अधिक मजबूत करण्यासह त्यांच्या मनातील पोलीस प्रशासनाबाबतचे नकारात्मक चित्र दूर करण्याच्या उद्देशाने आज महात्मा फुले चौक पोलीस ठाण्यात आयोजित ‘व्हिजिट माय पोलीस स्टेशन’ उपक्रमाला उत्स्फूर्त प्रतिसाद मिळाला. अनेक लोकप्रतिनिधी, सामान्य नागरिक, शालेय विद्यार्थी यांच्यासह महिला वर्गाने यामध्ये मोठा सहभाग घेतल्याचे दिसून आले. (‘Visit My Police Station’ Initiative at Mahatma Phule Chowk Police Station in Kalyan Receives Overwhelming Response)
या उपक्रमाचे आयोजन महाराष्ट्र राज्य विधी सेवा प्राधिकरण, ठाणे जिल्हा प्राधिकरण, ठाणे पोलीस आयुक्तालय, ग्लोबल केअर फाउंडेशन आणि नॅशनल सर्व्हिस स्कीम यांच्या संयुक्त विद्यमाने करण्यात आले होते. पोलीस आयुक्त आशुतोष डुंबरे यांच्या संकल्पनेतून ठाणे शहरातील सर्व पोलिस ठाण्यांमध्ये हा उपक्रम राबविण्यात आला.
नागरिकांमधील पोलिसांविषयीची अनावश्यक भीती दूर करणे, पोलिसांची कार्यपद्धती समजावून देणे, तसेच विविध कायदेशीर जागरूकता निर्माण करणे या हेतूने आयोजित केलेल्या कार्यक्रमात सर्व वयोगटातील नागरिक, सामाजिक संस्थांचे प्रतिनिधी, शाळा-महाविद्यालयांतील विद्यार्थी, प्रतिष्ठित नागरिक यांच्यासह महिला वर्गाची लक्षणीय उपस्थिती होती. या सर्वांनी महात्मा फुले पोलीस ठाण्यातील प्रत्येक विभागाला भेट देत त्याची कार्यपद्धती संबंधित अधिकाऱ्यांकडून समजावून घेतली.
तसेच या कार्यक्रमादरम्यान नागरिकांना पोलीस ठाण्याची सद्यस्थिती, विविध विभागांचे कार्य, तक्रार नोंद प्रक्रिया, महत्त्वाचे कायदे, नागरिक हक्क, सायबर गुन्हे प्रतिबंध, महिला सुरक्षा, वाहतूक नियम आदी मुद्द्यांवर सविस्तर माहिती देण्यात आली. तर उपस्थित नागरिकांनीही थेट वरिष्ठ पोलीस अधिकाऱ्यांशी संवाद साधत मार्गदर्शन घेतले.
तर केवळ आजच्या दिवसपुरता हा उपक्रम न राबवता एरव्हीही सामान्य नागरीकांना पोलीसांकडून अशाच प्रकारे सहकार्याची वागणूक मिळण्याची अपेक्षा उपस्थित महिलांनी यावेळी व्यक्त केली. तसेच आम्ही आज पहिल्यांदा पोलीस ठाण्यात आलो असून समजात ज्याप्रकारे पोलिसांबद्दल नकारात्मक चित्र निर्माण करण्यात आले आहे तसे अजिबात नसून रिल लाईफ आणि रिअल लाईफमध्ये खूप जास्त फरक असल्याची बोलकी प्रतिक्रिया लॉचे शिक्षण घेत असलेल्या प्राची रोकडे या विद्यार्थीनीने व्यक्त केली.
त्यावर बोलताना महात्मा फुले पोलीस ठाण्याचे वरिष्ठ पोलीस निरीक्षक बी. एस. परदेशी यांनी सांगितले की “नागरिक आणि पोलीस यांच्यातील विश्वास वाढवणे हा आमचा या उपक्रमातील प्रमुख उद्देश आहे. सण-उत्सवांच्या काळात सुव्यवस्था राखण्यासाठी नागरिकांची साथ आमच्यासाठी अत्यंत महत्त्वाची असून यापुढेही नागरिकांना आमच्याकडून अशाचप्रकारे सकारात्मक प्रतिसाद दिला जाईल असा विश्वास यावेळी व्यक्त केला.