रोटरी क्लब ऑफ न्यू कल्याण आणि केडीएमसीचा संयुक्त उपक्रम; ३, ५, १० आणि २१ किलोमीटरच्या स्पर्धांचे आयोजन
कल्याण |३ नोव्हेंबर
आरोग्य, फिटनेस आणि सामाजिक बांधिलकी यांचा संगम घडवणारी प्रतिष्ठित ‘बोरगावकर रोटरी कल्याण मॅरेथॉन’ यंदा सातव्या पर्वात पदार्पण करत आहे. रोटरी क्लब ऑफ न्यू कल्याण आणि कल्याण-डोंबिवली महानगरपालिका यांच्या संयुक्त विद्यमाने रविवार, २२ नोव्हेंबर २०२६ रोजी या मॅरेथॉनचे आयोजन करण्यात आले आहे. शहरात धावण्याची संस्कृती रुजविण्यासोबतच निरोगी जीवनशैलीचा संदेश देणाऱ्या या उपक्रमात कल्याण-डोंबिवलीकरांनी मोठ्या संख्येने सहभागी व्हावे, असे आवाहन आयोजकांनी केले आहे.
गेल्या सहा वर्षांत धावपटू आणि क्रीडाप्रेमी नागरिकांचा उत्स्फूर्त प्रतिसाद मिळवणाऱ्या या मॅरेथॉनने कल्याणच्या क्रीडा क्षेत्रात स्वतःचे वेगळे स्थान निर्माण केले आहे. उत्कृष्ट आयोजन, नियोजनबद्ध व्यवस्थापन आणि धावपटूंना मिळणाऱ्या दर्जेदार सुविधांच्या बळावर या मॅरेथॉनने सलग तीन वर्षे MRR (Mumbai Road Runners) रेस रेटिंगमध्ये प्रथम क्रमांकाचा मान मिळवला आहे. हा गौरव म्हणजे आयोजकांच्या सातत्यपूर्ण प्रयत्नांसह धावपटूंच्या विश्वासाची आणि नागरिकांच्या वाढत्या सहभागाची पावती मानली जात आहे.
नवोदितांपासून अनुभवी धावपटूंपर्यंत सर्वांसाठी संधी…
यंदाच्या मॅरेथॉनमध्ये ३ किमी, ५ किमी, १० किमी आणि २१ किमी अशा चार गटांमध्ये धावण्याच्या स्पर्धा आयोजित करण्यात आल्या आहेत. त्यामुळे प्रथमच मॅरेथॉनमध्ये सहभागी होणारे नवोदित धावपटू, विद्यार्थी, तरुणाई, फिटनेसप्रेमी तसेच अनुभवी मॅरेथॉनपटूंना आपल्या क्षमतेनुसार सहभाग नोंदवता येणार आहे.
धावणे हा केवळ व्यायामाचा प्रकार नसून निरोगी आणि सक्रिय जीवनशैलीचा महत्त्वपूर्ण भाग आहे. नागरिकांमध्ये आरोग्याविषयी जागरूकता निर्माण करणे, नियमित व्यायामाची सवय लावणे आणि शहरात फिटनेस संस्कृतीला प्रोत्साहन देणे हा या उपक्रमामागील प्रमुख उद्देश आहे.
धावपटूंच्या सहभागातून समाजसेवेला बळ…
या मॅरेथॉनचे सर्वात महत्त्वाचे वैशिष्ट्य म्हणजे ही केवळ क्रीडा स्पर्धा नसून समाजहितासाठी राबविण्यात येणारा उपक्रम आहे. मॅरेथॉनच्या माध्यमातून जमा होणारा निधी रोटरी क्लब ऑफ न्यू कल्याणच्या विविध सामाजिक आणि सेवाभावी प्रकल्पांसाठी वापरण्यात येणार आहे. यामध्ये रोटरी दिव्यांग सेंटर, गरजू विद्यार्थ्यांचे शैक्षणिक सहाय्य, बालआरोग्यविषयक उपक्रम तसेच स्थानिक पातळीवरील विविध सामाजिक कल्याणकारी प्रकल्पांचा समावेश आहे. त्यामुळे प्रत्येक धावपटूचा सहभाग हा केवळ स्वतःच्या आरोग्यासाठीच नव्हे, तर समाजातील गरजू घटकांच्या मदतीसाठीही महत्त्वपूर्ण ठरणार आहे.
प्रशासनाचे सहकार्य; नागरिकांना सहभागाचे आवाहन
या उपक्रमाला कल्याण-डोंबिवली महानगरपालिका आणि महाराष्ट्र पोलीस यांच्या संबंधित विभागांचे विशेष सहकार्य लाभत आहे. महानगरपालिका आयुक्तांनीही शहरातील नागरिकांना या मॅरेथॉनमध्ये मोठ्या संख्येने सहभागी होण्याचे आवाहन केले आहे. निरोगी, सुदृढ आणि सक्रिय कल्याण-डोंबिवली घडविण्यासाठी अशा उपक्रमांमध्ये नागरिकांचा सहभाग महत्त्वाचा असल्याचे त्यांनी अधोरेखित केले आहे.
कल्याण-डोंबिवलीसह आसपासच्या परिसरातील नागरिक, विद्यार्थी, तरुणाई, क्रीडाप्रेमी, धावपटू, विविध सामाजिक संस्था आणि संघटनांनी या सातव्या पर्वात उत्स्फूर्त सहभाग नोंदवावा, असे आवाहन रोटरी क्लब ऑफ न्यू कल्याणच्या वतीने करण्यात आले आहे.
दिनांक : रविवार, २२ नोव्हेंबर २०२६
स्पर्धेचे प्रकार :३ किमी | ५ किमी | १० किमी | २१ किमी
नोंदणी – अधिक माहितीसाठी संपर्क : ९३२६२११६११
