खासदार डॉ. श्रीकांत शिंदे यांच्या उपस्थितीत प्रमाणपत्र प्रदान
डोंबिवली : १५ ऑगस्ट रोजी डोंबिवलीत साकारलेल्या ३५ हजार चौरस फुटांच्या विशाल तिरंग्यासह विश्वविक्रमी तिरंगा रॅलीच्या यशात मोलाचे योगदान देणाऱ्या १०० सामाजिक संस्था आणि ७१ शाळांप्रती कृतज्ञता व्यक्त करण्यासाठी आज डोंबिवली येथे कृतज्ञता सोहळा पार पडला. कल्याण लोकसभा मतदारसंघाचे खासदार डॉ. श्रीकांत एकनाथ शिंदे यांच्या उपस्थितीत झालेल्या या सोहळ्यात सहभागी सामाजिक संस्थांचे प्रतिनिधी तसेच शाळांचे मुख्याध्यापक, शिक्षक आणि संबंधित मान्यवरांना प्रमाणपत्र प्रदान करून सन्मानित करण्यात आले. (100 Social Organisations and 71 Schools Honoured for Their Participation in the World Record Tiranga Rally)
१५ ऑगस्ट रोजी डोंबिवली येथे आयोजित करण्यात आलेल्या या ऐतिहासिक तिरंगा रॅलीत मुसळधार पावसाचीही तमा न बाळगता हजारो विद्यार्थी आणि नागरिक सहभागी झाले होते. ३५ हजार चौरस फुटांचा विशाल तिरंगा हातात घेऊन नागरिकांनी केलेले मार्गक्रमण आणि रॅलीला मिळालेला उत्स्फूर्त प्रतिसाद यामुळे डोंबिवलीत राष्ट्रभक्तीचा अभूतपूर्व सोहळा साकारला. या उपक्रमाची World Records India, Asia Book of Records आणि India Book of Records या तीन विक्रम नोंद संस्थांकडून अधिकृत नोंद करण्यात आली.
या विश्वविक्रमी उपक्रमाच्या यशामागे डोंबिवलीतील १०० सामाजिक संस्था आणि ७१ शाळांचा सक्रिय सहभाग होता. विद्यार्थ्यांपासून शिक्षक, पालक, सामाजिक संस्थांचे पदाधिकारी आणि स्वयंसेवकांपर्यंत विविध घटकांनी एकत्र येत या रॅलीला मोठे बळ दिले. या सर्वांच्या योगदानाची दखल घेत आजच्या कृतज्ञता सोहळ्यात त्यांचा सन्मान करण्यात आला.
यावेळी बोलताना खासदार डॉ. श्रीकांत शिंदे म्हणाले की, १५ ऑगस्ट रोजी डोंबिवलीच्या रस्त्यांवर एक विशाल तिरंगा घेऊन हजारो नागरिक एकत्र आलेला क्षण हा अत्यंत अभिमानाचा होता. मुसळधार पाऊस सुरू असतानाही विद्यार्थी, शिक्षक, पालक, सामाजिक संस्थांचे पदाधिकारी आणि नागरिकांनी दाखवलेला उत्साह अविस्मरणीय होता. या विश्वविक्रमी रॅलीचा विक्रम हा केवळ एका उपक्रमाचा विक्रम नसून डोंबिवलीकरांच्या राष्ट्रप्रेमाचा, सामाजिक एकतेचा आणि सामूहिक सहभागाचा गौरव आहे.
या उपक्रमाच्या माध्यमातून विद्यार्थ्यांच्या मनात राष्ट्रध्वजाबद्दलचा अभिमान आणि देशाप्रती असलेली जबाबदारी अधिक दृढ करण्याचा प्रयत्न करण्यात आला. हजारो विद्यार्थ्यांनी तिरंगा हातात घेऊन रॅलीत सहभाग घेतला, ही विशेष समाधानाची बाब आहे. नव्या पिढीने देशाच्या प्रगतीसाठी पुढे यावे आणि राष्ट्रनिर्माणाच्या कार्यात आपले योगदान द्यावे, अशी अपेक्षाही त्यांनी व्यक्त केली.
१०० सामाजिक संस्था आणि ७१ शाळांनी एकत्र येत दिलेले योगदान हे डोंबिवलीच्या सामाजिक एकतेचे उत्तम उदाहरण आहे. विविध क्षेत्रांतील संस्था, विद्यार्थी आणि नागरिक एका तिरंग्याखाली एकत्र येऊ शकतात, याची ताकद या रॅलीच्या माध्यमातून दिसून आली. या सर्वांच्या योगदानाप्रती कृतज्ञता व्यक्त करण्यासाठी आजचा सोहळा आयोजित करण्यात आला असून, सहभागी प्रत्येक संस्था, शाळा, विद्यार्थी, शिक्षक, पालक, स्वयंसेवक आणि नागरिकांचे मनःपूर्वक आभार असल्याचे खासदार डॉ. श्रीकांत शिंदे यांनी सांगितले.
१५ ऑगस्टच्या या विश्वविक्रमी तिरंगा रॅलीने डोंबिवलीच्या सामाजिक आणि राष्ट्रभक्तीच्या एकजुटीचे दर्शन घडवले. तीन विक्रम नोंद संस्थांकडून या उपक्रमाची अधिकृत नोंद होणे ही डोंबिवलीसह संपूर्ण कल्याण लोकसभा मतदारसंघासाठी अभिमानाची बाब असल्याचेही यावेळी नमूद करण्यात आले.
या कृतज्ञता सोहळ्यास सहभागी सामाजिक संस्थांचे मान्यवर अध्यक्ष, शाळांचे मुख्याध्यापक, शिक्षक, पालक आणि नागरिक मोठ्या संख्येने उपस्थित होते. यावेळी आमदार राजेश मोरे, जिल्हाप्रमुख गोपाळ लांडगे, उपजिल्हाप्रमुख राजेश कदम यांच्यासह विविध सामाजिक संस्थांचे पदाधिकारी आणि मान्यवर उपस्थित होते.
