५८ वर्षीय विजय सकपाळ यांची ७२ किमीची खडतर शर्यत १२ तास ३६ मिनिटांत पूर्ण; ६५ वर्षीय गोपीनाथ नायर यांच्यासह तीन धावपटूंची दमदार कामगिरी
डोंबिवली | २९ सप्टेंबर :
लडाखमधील विरळ ऑक्सिजन, शून्यापेक्षा कमी तापमान आणि समुद्रसपाटीपासून तब्बल १७,६१५ फूट उंचीवरील अत्यंत आव्हानात्मक भौगोलिक परिस्थितीवर मात करत कल्याण डोंबिवलीच्या ‘रनर्स क्लॅन फाउंडेशन’ (RCF)च्या धावपटूंनी प्रतिष्ठेच्या ‘खारदुंगला चॅलेंज’मध्ये उल्लेखनीय कामगिरी करत कल्याण-डोंबिवलीच्या शिरपेचात मानाचा तुरा रोवला आहे. शहराच्या क्रीडा क्षेत्रासाठी ही कामगिरी विशेष ठरली असून RCFच्या धावपटूंनी लडाखच्या कठीण भूमीवर आपल्या जिद्दीची आणि फिटनेसची छाप उमटवली. (Kalyan-Dombivli Makes Its Mark! RCF Runners Deliver Historic Performance at Ladakh’s Khardung La Challenge)
५८व्या वर्षी विजय सकपाळ यांची ७२ किमीची ऐतिहासिक झेप…
‘खरदुंगला चॅलेंज’मधील तब्बल ७२ किलोमीटरची शर्यत RCFचे ५८ वर्षीय धावपटू विजय सकपाळ यांनी १२ तास ३६ मिनिटे २८ सेकंदांत पूर्ण केली. समुद्रसपाटीपासून १७,६१५ फूट उंचीवरील या आव्हानात्मक शर्यतीत त्यांनी प्रतिकूल हवामान, कमी ऑक्सिजन आणि खडतर मार्गावर मात करत उल्लेखनीय कामगिरी केली. कल्याण-डोंबिवली परिसरातून या स्तरावरील ७२ किमीचे आव्हान पूर्ण करणाऱ्या धावपटूंमध्ये सकपाळ यांच्या कामगिरीचे विशेष कौतुक होत आहे. वयाच्या ५८व्या वर्षी त्यांनी दाखवलेली ही जिद्द नव्या पिढीतील धावपटूंसाठी प्रेरणादायी ठरली आहे.
६५ वर्षीय गोपीनाथ नायर यांचीही दमदार कामगिरी…
RCFचे ६५ वर्षीय गोपीनाथ नायर यांनीही वाढत्या वयाला आव्हान देत ४२.१९५ किलोमीटरची फुल मॅरेथॉन ६ तास ३२ मिनिटांत पूर्ण केली. लडाखसारख्या उंचावरील आणि ऑक्सिजनची कमतरता असलेल्या प्रदेशात ही शर्यत पूर्ण करून त्यांनी वयाला मर्यादा मानणाऱ्यांसमोर फिटनेस आणि सातत्याचा आदर्श ठेवला. RCFचे ३५ वर्षीय दिगेंदर महारा यांनीही ४२.१९५ किलोमीटरची फुल मॅरेथॉन ४ तास २७ मिनिटांत पूर्ण करत उल्लेखनीय कामगिरी नोंदवली.
नऊवारी साडीत वैशाली सकपाळ यांची ५ किमी धाव…
या मोहिमेतील आणखी एक आकर्षण ठरले ते वैशाली विजय सकपाळ यांचे. त्यांनी लडाखच्या भूमीवर महाराष्ट्रीयन पारंपरिक नऊवारी साडी परिधान करून ५ किलोमीटरची धाव पूर्ण केली. लडाखमध्ये मराठी संस्कृतीची अनोखी झलक सादर करणाऱ्या वैशाली सकपाळ यांच्या सहभागाने उपस्थितांचे लक्ष वेधून घेतले. त्यांच्या या अनोख्या सहभागाची दखल घेत आयोजकांनी त्यांना व्यासपीठावर विशेष आमंत्रित करून सन्मानित केले.
‘जिद्द आणि सातत्य असेल तर वय अडथळा ठरत नाही’…
या यशानंतर RCFच्या धावपटूंनी “योग्य सराव, जिद्द आणि सातत्य असेल तर वयाची कोणतीही अट आडवी येत नाही,” असा प्रेरणादायी संदेश दिला. लडाखच्या अत्यंत खडतर परिस्थितीत मिळवलेल्या या कामगिरीमुळे कल्याण-डोंबिवलीच्या क्रीडा क्षेत्राची मान उंचावली असून RCFच्या या धावपटूंचे क्रीडाप्रेमी, धावपटू आणि नागरिकांकडून अभिनंदन होत आहे.
