जागतिक महिला दिन विशेष : कॅन्सरच्या जनजागृतीसाठी कल्याणात महिलांचा “साडी वॉकेथॉन”

कल्याण रेडिओलॉजिस्ट असो. आणि केडीएमसीचा संयुक्त उपक्रम

कल्याण दि.8 मार्च :
देशभरात महिलांमध्ये ब्रेस्ट आणि गर्भाशयाच्या कॅन्सरचे प्रमाण वाढत असून त्याबाबत जनजागृती करण्यासाठी जागतिक महिला दिनानिमित्त कल्याणात ‘साडी वॉकेथॉन’ उपक्रम राबविण्यात आला. कल्याण रेडिओलॉजिस्ट असोसिएशन आणि कल्याण डोंबिवली महानगरपालिकेच्या संयुक्त विद्यमाने हा उपक्रम राबवण्यात आला. (International Women’s Day Special: Women’s “Sari Walkathon” in Kalyan to raise awareness about cancer)

कल्याण पश्चिमेतील स्व. यशवंतराव चव्हाण क्रीडांगण येथून या साडी वॉकेथॉनला प्रारंभ करण्यात आला. ज्यामध्ये कल्याण शहरातील डॉक्टर, उद्योजक, नोकरदार, गृहिणी अशा सर्वच गटातील महिला मोठ्या संख्येने सहभागी झाल्या होत्या. या सर्व महिलांनी भारतातील महिलांचा पारंपरिक वेश म्हणून समजला जाणारा जाणाऱ्या साडी नेसून या उपक्रमात भाग घेत ब्रेस्ट आणि गर्भाशयाच्या कॅन्सरबाबत जनजागृतीचा संदेश दिला. ज्यामध्ये केडीएमसीच्या आयुक्त डॉ. इंदू राणी जाखड, कल्याण आयएमए अध्यक्ष डॉ. सुरेखा ईटकर, डॉ. सारिका दुबे, डॉ. किरण शिंदे, डॉ. सोनाली पाटील या आघाडीच्या महिलांनी यामध्ये पुढाकार घेतल्याचे दिसून आले.

केडीएमसी आयुक्त डॉ. इंदू राणी जाखड यांनी या उपक्रमाचे कौतुक करत महिलांनी स्वतःचे शारीरिक आरोग्य, मानसिक आरोग्याकडे लक्ष दिले पाहिजे. विशेषता नोकरदार महिलांनी वेळेचे नियोजन केल्यास आरोग्य चांगले राहील असा मोलाचा सल्ला आयुक्त डॉ. जाखड यांनी यावेळी दिला. आणि विशेष करून आजच्या काळात महिलांनी महिलांच्या पाठीशी उभे राहण्याची गरजही त्यांनी अधोरेखित केली.

तर स्व. यशवंतराव चव्हाण क्रीडांगण येथून निघालेला हा साडी वॉकेथॉन नंतर राणी लक्ष्मीबाई उद्यानात येऊन विसर्जित झाला. त्यानंतर याठिकाणी असलेल्या ज्येष्ठ नागरिक संघाच्या विरंगुळा केंद्र परिसरात कॅन्सर तज्ञ डॉ. अंजुम सय्यद, डॉ. अमित घाणेकर या दोघांनीही ब्रेस्ट कॅन्सर आणि सर्व्हायकल कॅन्सरबाबत उपस्थित महिलांना मार्गदर्शन केले. हे दोन्ही कॅन्सर आपापली लक्षणे दाखवत असतात, महिला वर्गाने त्याकडे दुर्लक्ष न करता तातडीनं चाचणी करून घेणे आवश्यक आहे. या दोन्ही कॅन्सर संदर्भातील औषधे आणि उपचार उपलब्ध असल्याचेही या डॉक्टरांनी सांगितले. तर व्हॅक्सिन तज्ञ डॉ. सोनाली पाटील यांनी ब्रेस्ट आणि सर्व्हायकल कॅन्सरसाठी भारतात उपलब्ध असलेल्या व्हॅक्सिनची उपस्थित महिलांना सखोल माहिती दिली. तसेच ही वॅक्सिन कोणी आणि किती वयामध्ये घ्यावीत याबाबतही उपस्थिताना मार्गदर्शन केले.

या कार्यक्रमाला केडीएमसी आयुक्त डॉ. इंदू राणी जाखड, महाराष्ट्र रेडिओलॉजि असो अध्यक्ष डॉ. प्रशांत पाटील, केडीएमसीचे उपायुक्त संजय जाधव, विद्युत विभागाचे कार्यकारी अभियंता प्रशांत भागवत, युवा उद्योजक मच्छिंद्र जाधव यांच्यासह अनेक मान्यवर उपस्थित होते.