नविन घर अधिकृत आहे की अनधिकृत समजण्यासाठी केडीएमसीने सुरू केली हेल्पलाईन

कल्याण/डोंबिवली दि.29 जानेवारी :
काय नविन घर घेताय? पण तुम्ही घेत असणारे नविन घर अधिकृत आहे की अनधिकृत? याबाबत लोकांची फसवणूक टळण्यासह अनधिकृत बांधकामांना आळा बसण्यासाठी केडीएमसीने एक महत्त्वाचा निर्णय घेतला आहे. बांधकाम अधिकृत आहे की अनधिकृत हे सांगण्यासाठी केडीएमसीने टोल फ्री हेल्पलाईन सुरू केल्याची माहिती महापालिका आयुक्त डॉ. विजय सूर्यवंशी यांनी दिली आहे. कल्याण डोंबिवली जर्नलिस्ट असोसिएशनबरोबर झालेल्या वार्तालापात डॉ. सूर्यवंशी यांनी ही माहिती दिली.

कल्याण डोंबिवली आणि अनधिकृत बांधकामांचा प्रश्न तसा नविन नाही. गेल्या काही वर्षांत कल्याण डोंबिवलीमध्ये अनधिकृत बांधकामामध्ये झपाट्याने वाढ झाली असून हा प्रश्न केडीएमसी प्रशासनाच्या हाताबाहेर गेलाय की काय असा प्रश्न निर्माण झाला आहे. महापालिका आपल्या स्तरावर अनधिकृत बांधकामांवरील कारवाई सुरूच असल्याची आकडेवारी देत असली तरी प्रत्यक्षात अनधिकृत बांधकामांची संख्या आणि पालिकेची कारवाई तोकडी पडत असल्याचे दिसत आहे. तर लाखो रुपये खर्चून घरं घेणाऱ्या आणि फसवणूक झालेल्या लोकांच्या मनामध्ये पालिकेच्या कारवाईच्या भितीची टांगती तलवार कायम असते. आयुष्यभराची कमाई घर घेण्यासाठी वापरण्यात आल्याने कारवाईच्या भितीपोटी होणारा मानसिक त्रास म्हणजे आगीतून फुफाट्यात अशी लोकांची अवस्था होते.
मात्र लोकांचे खर्च होणारे लाखो रुपयांची फसवणूक आणि हा मानसिक त्रास वाचवण्यासाठी केडीएमसी प्रशासनाने एक महत्वपूर्ण निर्णय घेतला आहे. एखादी इमारत अधिकृत आहे की अनधिकृत याची माहिती केवळ एका कॉलवर समजणार आहे. यासाठी केडीएमसीने 18002337295 या टोल फ्री क्रमांकाची हेल्पलाईन सुरू केली आहे. यावर आपण एखाद्या इमारतीची माहिती विचारल्यास ठराविक वेळेत ती संबंधित व्यक्तीला उपलब्ध करून दिली जाणार असल्याचे महापालिका आयुक्त डॉ. विजय सूर्यवंशी यांनी यावेळी सांगितले.
केडीएमसी आयुक्त डॉ. विजय सूर्यवंशी यांनी घेतलेल्या या निर्णयामुळे भविष्यात लोकांची आर्थिक फसवणूक, मानसिक त्रास आणि कारवाईची टांगती तलवार या तिन्ही त्रासातून निश्चितच सुटका होणार आहे.